Cun fermezza, experientscha e team #3 per il Grischun

13. April 2026 – Cun ina squadra ferma, messadis clers ed in’atmosfera da partenza plain schlantsch ha Il Center Grischun lantschà a Tusaun la campagna electorala per las elecziuns da la Regenza e dal Cussegl grond dals 14 da zercladur 2026. Trais persunalitads cumprovadas per la Regenza e 98 candidatas e candidats sin la glista 3 per il Cussegl grond. La partida marscha enavant sco forza ferma e bain ragischada en tut il Grischun.

L’act electoral da partenza en la Halla Karbid a Tusaun ha signalisà cleramain:

Il Center Grischun surpiglia responsabladad e porta progress al chantun cun soluziuns concretas, fidadadad e voluntad politica creativa. «Gist en in temp da malsegirezzas creschentas dovra il Grischun ina forza che collia, dat orientaziun e metta en moviment», constatescha il president da partida Kevin Brunold.

Per las elecziuns da la Regenza propona Il Center Grischun ina squadra credibla, cun experientscha, cumpetenza da manar e fidadadad. Carmelia Maissen (en uffizi), Marcus Caduff (en uffizi) ed Aita Zanetti represchentan stabilitad, cumpetenza politica ed abilitad d’unir e far punts. Cun questas trais candidadaturas propona Il Center Grischun trais persunalitads cumprovadas che enconuschan il chantun, che portan responsabladad e che vulan sviluppar vinavant il Grischun cun persvasiun ed a moda equilibrada.

Er tar las elecziuns dal Cussegl grond demonstrescha Il Center Grischun fermezza:
la glista 3 cun 98 candidatas e candidats en 35 circuls electorals reflectescha ina politica che è datiers dals umans e che rinforza la coesiun en il chantun. «La vasta enregischaziun regiunala suttastritga la voluntad dal Center Grischun dad esser preschents en tut las regiuns dal Grischun e da surpigliar responsabladad», uschia il deputà Brunold.

L’inscunter a Tusaun è in cler signal  per unitad, confidenza e schlantsch politic. Il Center Grischun va cun schlantsch en il cumbat electoral.  La partida è pronta da rinforzar il Grischun en tut sia ritgezia e diversitad.